Germaniya Bundestagining matbuot ma’lumotiga ko‘ra, delegatsiya rahbaridan tashqari olti nafar deputatdan iborat. Ular Karsten Brodesser, Mextilde Vittmann, Kay Gotshalk, Mixael Tevs, Maks Luks va Doris Axlvelmdir.
Delegatsiya tarkibida CDU/CSU, AfD, SPD, Bündnis 90/Die Grünen va Die Linke partiyalari vakillari bor. Brodesser va Vittmann CDU/CSU, Gotshalk AfD, Tevs SPD, Luks Bündnis 90/Die Grünen, Axlvelm esa Die Linke partiyasidan.
Bundestag ma’lumotida Janubiy Koreya eksportga yo‘naltirilgan sanoat mamlakati sifatida Germaniyada ham mavjud bo‘lgan qator muammolarga duch kelayotgani qayd etiladi. Ular qatorida AQSh ma’muriyati siyosatidagi o‘zgarishlarning ta’siri, amaldagi xavfsizlik va iqtisodiy tartibning shubha ostiga qo‘yilishi, demografik o‘zgarish, davlat qarzi va iqtisodiy raqobatbardoshlik bilan bog‘liq muammolar sanalgan.
Safar kun tartibida global bozorlar sharoitida soliqqa tortish va fiskal barqarorlik, yangi xatarlar fonida moliyaviy barqarorlikni ta’minlash, moliya bozorini raqamlashtirish va innovatsiyalar masalalari bor. Shuningdek, pul yuvish, soliqdan bo‘yin tovlash va moliyaviy jinoyatchilikka qarshi kurash mavzulari ham ko‘rib chiqilishi rejalashtirilgan.
Delegatsiya Koreya parlamentining tegishli qo‘mitasi a’zolari va hukumat vakillari, jumladan Koreya byudjet vazirligi hamda Milliy soliq xizmati vakillari bilan uchrashuvlar o‘tkazishni rejalashtirmoqda. Shuningdek, Koreya markaziy banki, moliyaviy nazorat organi va pensiya idorasi vakillari, olimlar hamda biznes vakillari bilan muzokaralar o‘tkazilishi ko‘zda tutilgan.
Dasturdan Shimoliy Koreya bilan chegaradagi Koreya qurolsizlantirilgan hududiga tashrif ham o‘rin olgan. Bundestag ma’lumotiga ko‘ra, delegatsiya a’zolari u yerda xavfsizlik holati va Koreyadagi geosiyosiy vaziyat haqida ma’lumot oladi.